500 ரூபாய் நோட்டில் புதிய அப்டேட்.. பொதுமக்களுக்கு ரிசர்வ் வங்கி எச்சரிக்கை!
500 ரூபாய் நோட்டுகள் தொடர்பாக ஒரு முக்கியமான அறிவிப்பை ரிசர்வ் வங்கி வெளியிட்டுள்ளது. அந்த நோட்டுகளைப் பயன்படுத்தும் வாடிக்கையாளர்கள் அனைவரும் அதுபற்றி கட்டாயம் தெரிந்துகொள்ள வேண்டும்.
ஒரிஜினல் நோட்டுகள் போலவே போலியான 500 ரூபாய் நோட்டுகள் அதிகமாகப் புழங்குவதாகவும், அதைக் கண்டுபிடிக்க வேண்டிய வழிமுறைகள் குறித்தும் ரிசர்வ் வங்கி பொதுமக்களுக்கு அறிவிப்பு வெளியிட்டுள்ளது.
இன்றைய காலகட்டத்தில் டிஜிட்டல் பரிவர்த்தனைகள் அதிகரித்துள்ள சூழலில், ரொக்கப் பணப் புழ்க்கம் வெகுவாகக் குறைந்துள்ளது. எனினும் ரொக்கப் பணம் பெரும்பாலான இடங்களில் தேவைப்படுகிறது. அதில் கள்ள நோட்டுகளும் சில இடங்களில் புழங்குவதாகத் தெரிகிறது. சொல்லப்போனால் நல்ல நோட்டுகளுக்கும் கள்ள நோட்டுகளுக்கும் வித்தியாசம் கண்டுபிடிப்பதே பெரும் சிரமமாக இருக்கிறது. நிறையப் பேர் ஏமாந்து விடுகின்றனர்.
இந்தியாவில் சில நாட்களுக்கு முன்னர் 2000 ரூபாய் நோட்டுகள் புழக்கத்திலிருந்து நீக்கப்பட்டுள்ளன. அதுவரையில், 2000 ரூபாய் நோட்டுகள்தான் மதிப்பு அதிகம் கொண்ட நோட்டுகளாக இருந்தன. இப்போது அந்த நோட்டுகள் இல்லை. 2000 ரூபாய் நோட்டுகள் அதிகளவில் கள்ள நோட்டுகளாகவும் கருப்பு பணமாகவும் புழங்கிக் கொண்டிருந்ததாக கூறப்பட்டது. இந்நிலையில் அது தற்போது இல்லை.
500 ரூபாய் நோட்டு!
2000 ரூபாய் நோட்டுகள் தற்போது இல்லை என்பதால் 500 ரூபாய் நோட்டுகள் தான் மதிப்பு உயர்ந்த நோட்டுகளாக இருக்கின்றன. எனவே இந்த 500 ரூபாய் நோட்டுகளில் இனி அதிகமாக மோசடிகள் நடக்க வாய்ப்பு உள்ளது. அதாவது, 500 ரூபாய் நோட்டுகளில் கள்ள நோட்டுகள் அதிகமாகப் புழங்கும் சூழல் உருவாகியுள்ளது.
ரிசர்வ் வங்கி எச்சரிக்கை!
இதுபோன்ற சூழலில் 500 ரூபாய் நோட்டுகள் குறித்து மிக முக்கியமான அறிவிப்பை ரிசர்வ் வங்கி வெளியிட்டுள்ளது. அதன்படி, 500 ரூபாய் நோட்டுகளின் அளவில் 63 மி.மீ x 150 மி.மீ என்ற அளவில் இருக்கும். அதன் நிறம் ஸ்டோன் கிரே கலர். அந்த நோட்டுகளில் சில புவியியல் குறியீடுகளும் இருக்கும். முன் பக்கத்தில் மகாத்மா காந்தியின் புகைப்படமும், பின் பக்கத்தில் செங்கோட்டையின் புகைப்படமும் இருக்கும். இதுபோன்ற அடையாளங்களை ரிசர்வ் வங்கி குறிப்பிட்டுள்ளது.
கண்டுபிடிப்பது எப்படி?
500 ரூபாய் நோட்டுகளில் சில வரிசை எண்கள் இருக்கும். அவை ஸ்மால் லெட்டரில் இருந்து கேப்பிட்டல் லெட்டர் வரை அதிகரித்துக் கொண்டே செல்லும் வகையில் இருக்கும். ரிசர்வ் வங்கி ஆளுநரின் கையெழுத்து இருக்கும். 500 ரூபாய் என்ற குறிப்பு வாட்டர் மார்க் மூலம் குறிப்பிடப்பட்டிருக்கும். மிக முக்கியமாக ரூபாய் நோட்டின் மேலிருந்து கீழ் புறமாக வரும் பாதுகாப்பு ஸ்ட்ரிப் மாறும் வண்ணத்துடன் இருக்கும். ரூபாய் நோட்டை மேல் புறமாக வைத்து கூர்ந்து கவனித்து அசைக்கும் போது அதன் வண்ணம் மாறும். இதன் மூலம் கள்ள நோட்டுகளைக் கண்டுபிடிக்க முடியும்.
