சமயநல்லூர் அருகே பாலத்தில் கார் மோதி சிறுவன்-பாட்டி பலி
கர்நாடக மாநிலம் பெங்களூருவை சேர்ந்தவர் கிருஷ்ணகுமார் (வயது 39). இவரது மனைவி நான்சி (38). இவர்களது மகன் ஷேரப் (வயது 3).
கிருஷ்ணகுமார் ராமேசுவரம் கோவிலுக்கு செல்லதிட்டமிட்டார். அதன்படி தனது மனைவி, மாமியார் நிர்மலா (54) மற்றும் மகனை அழைத்துக்கொண்டு பெங்களூருவில் இருந்து நேற்று இரவு காரில் புறப்பட்டார். காரை பெங்களூரு தாசர ஹள்ளியை சேர்ந்த கிருஷ்ணகுமார் (36) என்பவர் ஓட்டி வந்துள்ளார்.
அவர்களது கார் இன்று அதிகாலை மதுரை மாவட்டம் சமயநல்லூர் அருகே வந்து கொண்டிருந்தது. அப்போது கார் திடீரென டிரைவரின் கட்டுப்பாட்டை மீறி ரெயில்வே பாலத்தின் தடுப்பு சுவரில் மோதி கவிழ்ந்தது. இதில் காரின் முன்பகுதி அப்பளம்போல் நொறுங்கியது.
பாலத்தில் கார் மோதி விபத்தில் சிக்கியதை அந்த வழியாக மற்றொரு காரில் வந்த கேரள மாநிலம் பத்தனம் திட்டாவை சேர்ந்த பிஜூ என்பவர் பார்த்தார். அவர் விபத்து குறித்து சமயநல்லூர் போலீசாருக்கு தகவல் தெரிவித்தார். இதைத்தொடர்ந்து போலீசாரும், அந்த பகுதியை சேர்ந்த பொதுமக்களும் அங்கு வந்தனர்.
அவர்கள் காருக்குள் சிக்கியிருந்தவர்களை மீட்டனர். அவர்களில் கிருஷ்ணகுமாரின் மாமியார் நிர்மலா சம்பவ இடத்திலேயே பலியாகிவிட்டார். கிருஷ்ணகுமார், அவரது மனைவி, மகன், டிரைவர் ஆகிய 4 பேரும் படுகாயம் அடைந்திருந்தனர். அவர்கள் 4 பேரையும் மீட்டு சிகிச்சைக்காக ஆம்புலன்சு மூலம் மதுரை அரசு ஆஸ்பத்திரிக்கு அனுப்பி வைத்தனர்.
விபத்தில் பலியான நிர்மலாவின் உடலை மீட்டு பிரேத பரிசோதனைக்கு அனுப்பினர். இந்நிலையில் சிறுவன் ஷேரப் ஆஸ்பத்திரிக்கு கொண்டு செல்லும் வழியிலேயே பரிதாபமாக இறந்தான். இதனால் பலி எண்ணிக்கை 2 ஆனது.
கிருஷ்ணகுமார், அவரது மனைவி மற்றும் கார் டிரைவர் ஆகிய 3 பேரும் ஆஸ்பத்திரியில் அனுமதிக்கப்பட்டனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. இந்த விபத்து குறித்து சமயநல்லூர் போலீசார் வழக்குப்பதிந்து விசாரணை நடத்தி வருகின்றனர்.
