வாங்கிய கடனை தர மறுத்ததால் பெண்ணுக்கு அரிவாள் வெட்டு.
தருமபுரி மாவட்டம் மாரண்டஅள்ளி அமானி மல்லாபுரம் பகுதியைச் சேர்ந்தவர் முனிராஜ் (வயது60). கட்டிட மேஸ்திரி. இவருக்கு நாகம்மாள் (45) என்ற மனைவி உள்ளார்.
முனிராஜ் அடிக்கடி கர்நாடக மாநிலம் பெங்களூரு மற்றும் ஓசூர் போன்ற வெளியூர்களில் சென்று தங்கி கட்டிட வேலை பார்த்து வந்தார். இதன்காரணமாக அவர் வாரத்திற்கு ஒருமுறை மட்டுமே வீட்டிற்குவந்து செல்வார். இவருக்கு குடிபழக்கமும்
உள்ளது.
இந்த நிலையில் முனிராஜின் மனைவி நாகம்மாள் மகளிர் சுயஉதவிகுழு மூலமாக கடன் வாங்கி இருந்தார்.
இதுகுறித்து நேற்று வீட்டிற்கு வந்த முனிராஜூக்கு தகவல் தெரியவந்தது.அப்போது தனது மனைவியிடம் கடன் பெற்ற பணத்தில் இருந்து சிறிது தொகை கேட்டுள்ளார். இதனால் கணவன்-மனைவி இருவருக்கும் இடையே வாய்தகராறு ஏற்பட்டுள்ளது. அப்போது ஆத்திரமடைந்த முனிராஜ் மறைத்து வைத்திருந்த அரிவாளை எடுத்து நாகம்மாளை சரமாரியாக வெட்டினார். இதில் அவருக்கு கழுத்து, கை பகுதியில் வெட்டு விழுந்து காயமடைந்தார். இதனால் அவர் ரத்த வெள்ளத்தில் அதேஇடத்தில் மயங்கி கீழே விழுந்து வலியால் அலறிதுடித்தார். அவரது அலறல் சத்தம் கேட்டு அக்கம்பக்கத்தினர் ஓடிவந்தனர். அதற்குள் முனிராஜ் அங்கிருந்து தப்பித்து ஓடிவிட்டார். உடனே அக்கம்பக்கத்தினர் ரத்தவெள்ளத்தில் கிடந்த நாகம்மாளை மீட்டு சிகிச்சைக்காக தருமபுரி அரசு மருத்துவ கல்லூரி மருத்துவமனையில் அனுமதித்தனர். அங்கு அவருக்கு தீவிர சிகிச்சை பிரிவில் சிகிச்சை அளிக்கப்பட்டு வருகிறது.இதுகுறித்து அக்கம்பக்கத்தினர் மாரண்டஅள்ளி போலீஸ் நிலையத்தில் புகார் தெரிவித்தனர். புகாரின்பேரில் போலீசார் வழக்கு பதிவு செய்து விசாரணை நடத்தி வருகின்றனர்.
