காவல் துறையினருக்கு வாரம் ஒரு நாள் விடுமுறை.
டி.ஜி.பியின் அதிரடி உத்தரவு
காவல் துறையினருக்கு வாரத்தில் ஒரு நாள் விடுமுறை அளிக்க சட்டம் ஒழுங்கு சிறப்பு டி.ஜி.பி.ராஜேஸ் தாஸ் உத்தரவு பிறப்பித்துள்ளார்.
24 மணி நேர வேலை. தீபாவளி, பொங்கல் போன்ற முக்கிய விழாக்களில் கூட தங்கள் குடும்பத்தினருடன் விழாவை கொண்டாட முடியாமல் காவல் துறையினர் தவித்து வருகின்றனர், இந்த நிலையில் காவல் துறையினர் பலர் மன அழுத்தம் ஏற்பட்டு விபரீதமான முடிவை எடுக்கும் நிகழ்வுகளும் அண்மை காலமாக அதிகரித்து வருகிறது, இதையடுத்து காவல் துறையினருக்கு வாரம் ஒரு முறை விடுமுறை வழங்க வேண்டும் என பல ஆண்டுகளாக கோரிக்கை விடப்பட்டு வந்தது. கடந்த ஆண்டு காவல் துறையினருக்கு வாரத்தில் ஒரு நாள் விடுமுறை அளிப்பது தொடர்பாக உயர் நீதி மன்றமும் கருத்து தெரிவித்திருந்தது,
இந்த நிலையில் தமிழக காவல் துறையினருக்கு வாரத்திற்கு ஒரு நாள் விடுமுறை வழங்க வேண்டும் என சட்டம் ஒழுங்கு சிறப்பு டி.ஜி.பி.ராஜேஸ்தாஸ் உத்தரவு பிறப்பித்துள்ளார். இந்த உத்தரவு சென்னை தவிர அனைத்து மாநகர காவல் துறை ஆணையர் , மாவட்ட காவல் துறை கண்காணிப்பாளர் ஆகியோர்களுக்கும் பொருந்தும். இதனையடுத்து இனிமேல் காவல் துறையினருக்கு வாரம் ஒரு முறை சுழற்சி முறையில் விடுமுறை அளிக்கப்படும் என தெரிகிறது.
