போலீஸ் சங்கம் அமைக்க அனுமதிக்காவிட்டால், நோட்டாவுக்குத்தான் வாக்கு ஓய்வு பெற்ற டி.எஸ்.பி. கலியமூர்த்தி
போலீஸ் சங்கம் அமைக்க அனுமதிக்காவிட்டால் நோட்டாவுக்கு வாக்களிப்போம் என ஓய்வு பெற்ற காவலர்கள் நலச் சங்கம் அறிவித்துள்ளது.
ஈரோடு மாவட்டம் ஓய்வுபெற்ற காவலர்கள் நலச் சங்கம் ஆலோசனைக் கூட்டம் ஈரோடு வட்டாச்சியர் அலுவலக வளாகத்தில் உள்ள கூடலிங்கம் திடலில் ஞாயிற்றுக்கிழமை நடைபெற்றது. இக்கூட்டத்தில் நிறைவேற்றப்பட்ட தீர்மானங்கள்
சட்டப் பேரவை தேர்தலுக்கு முன்பாக காவலர்களுக்கு சங்கம் அமைக்க அனுமதி அளிக்க வேண்டும். இல்லையெனில் நோட்டாவுக்கு வாக்களிப்பது . தமிழகம் முழுவதும் காவலர் குடும்பங்களை நேரில் சந்தித்து நோட்டாவுக்குவாக்களிக்க வலியுறுத்துவது, ஓய்வு பெற்ற நேர்மையான அரசு அதிகாரிகளை சந்தித்து தேர்தலில் போட்டியிட கேட்டுக் கொள்ளுவது என பல் வேறு தீர்மானங்கள் நிறைவேற்றப்பட்டன.
இதனைத் தொடந்து, ஓய்வு பெற்ற டி.எஸ்.பி.கலியமூர்த்தி செய்தியாளர்களிடம் கூறியதாவது, தமிழகத்தில் 1.24 லட்சம் பேர் காவல் துறையில் பணியாற்றி வருகின்றனர். ஓய்வு பெற்றவர்கள் 75000 பேர் உள்ளனர் , இந்த 2 லட்சம் பேரின் குடும்பங்களை ஒருங்கிணைத்து பிரச்சாரம் செய்து வரும் சட்ட பேரவை தேர்தலில் அதிக எண்ணிக்கையில் வாக்குகளை நோட்டாவுக்கு பதிவு செய்ய திட்டமிட்டுள்ளோம். இதே போல தமிழகத்தில் மத்திய மாநில அரசு ஊழியர்கள், ஓய்வு பெற்றவர்கள் மற்றும் முன்னால் ராணுவத்தினர் 44.68 லட்சம் பேர் உள்ளனர். இவர்களை ஒருங்கிணைத்து எதிர்காலத்தில் தேர்தலில் போட்டியிட முடிவு செய்துள்ளோம் என்றார்.
