ஆண்டாள் குறித்து கவிஞர் வைரமுத்து பேசிய சர்ச்சைக்குரிய கருத்துக்கு தொடர்ந்து எதிர்ப்பு தெரிவித்து வரும் திருவில்லிபுத்தூர் ஜீயர் சடகோப ராமானுஜருக்கு 2-வது முறையாக நேற்று மிரட்டல் கடிதம் வந்துள்ளது.
விருதுநகர் மாவட்டம் ராஜபாளையத்தில் ஜன.7-ல் நடைபெற்ற நிகழ்ச்சி ஒன்றில், திருவில்லிபுத்தூர் ஆண்டாள் குறித்து கவிஞர் வைரமுத்து கூறிய கருத்துக்கு கடும் எதிர்ப்பு எழுந்தது. கவிஞர் வைரமுத்து, திருவில்லிபுத்தூர் ஆண்டாள் கோயிலுக்கு நேரில் வந்து மன்னிப்பு கேட்க வலியுறுத்தி திருவில்லிபுத்தூர் ஜீயர் சடகோப ராமானுஜர் 2 முறை உண்ணாவிரதப் போராட்டம் நடத்தினார்.
இந்நிலையில், ஜன.25-ல் ஜீயருக்கு மர்ம நபர் ஒருவர் தொலைபேசியில் மிரட்டல் விடுத்தார். மேலும், ஜீவா என்ற பெயரில் ஜீயருக்கு வந்த தபால் அட்டையில் மிரட்டல் விடுக்கப்பட்டிருந்தது. இதுகுறித்து போலீஸார் விசாரித்து வருகின்றனர்.
இந்நிலையில், 2-வது முறையாக ஜீயருக்கு நேற்றும் ஒரு மிரட்டல் கடிதம் வந்தது. எஸ்.ராஜேந்திரன், டாக்டர் அம்பேத்கர் பெரியார் தலித் கூட்டமைப்பு, பெரியார் நகர், பாலக்கரை, திருச்சி என்ற அனுப்புநர் முகவரியுடன் வந்த அந்த தபாலில் மிரட்டல் விடுக்கும் வகையில் எழுதப்பட்டிருந்தது. இதுகுறித்து, ஜீயர் சார்பில் புகார் அளிக்கப்பட்டதை அடுத்து திருவில்லிபுத்தூர் போலீஸார் விசாரித்து வருகின்றனர்.
