திருப்பூர்: திருப்பூர் பி.என்.ரோடு போயம்பாளையம் அருகே நேருநகரில் சவுடேஸ்வரி அம்மன் கோவில் உள்ளது. இந்த கோவில் பூசாரியாக அதே பகுதியை சேர்ந்த ராம்குமார் (35) என்பவர் இருந்து வருகிறார். தற்போது மார்கழி மாதம் என்பதால் கோவில் நடை தினமும் அதிகாலையில் திறக்கப்பட்டு பூஜைகள் செய்யப்பட்டு வருகிறது.
இந்த நிலையில் நேற்று முன்தினம் இரவு கோவிலில் பூஜை முடிந்ததும் வழக்கம் போல் கோவிலை பூட்டிவிட்டு ராம்குமார் தனது வீட்டுக்கு சென்று விட்டார். மார்கழி மாத பூஜைக்கு அதிகாலையிலேயே பக்தர்கள் கோவிலுக்கு வரத்தொடங்குவார்கள் என்பதால், நேற்று அதிகாலை கோவிலை திறந்து வைத்துவிட்டு, அருகில் உள்ள தனது வீட்டிற்கு ராம்குமார் சென்றுள்ளார்.
சிறிது நேரம் கழித்து திரும்பி வந்த அவர், கோவில் கருவறைக்குள் சென்ற போது, அம்மன் கழுத்தில் அணிவிக்கப்பட்டிருந்த 2 பவுன் தாலி, 4 தங்க காசு, கம்மல் மற்றும் அங்கிருந்த வெள்ளி பொருட்கள் கொள்ளையடிக்கப்பட்டிருந்தது கண்டு அதிர்ச்சியடைந்தார். உடனே அவர் இதுபற்றி அனுப்பர்பாளையம் காவல் நிலையத்துக்கு தகவல் கொடுத்தார்.
உடனே காவல்துறையினர் சம்பவ இடத்துக்கு விரைந்து வந்து விசாரணை நடத்தினார்கள். அதற்குள் கோவிலில் தங்க நகை-வெள்ளி பொருட்கள் கொள்ளை போனது பற்றி கேள்விப்பட்ட அந்த பகுதி பொதுமக்கள் மற்றும் சாமி தரிசனம் செய்ய வந்திருந்த பக்தர்கள் கோவில் முன் திரண்டனர். இதனால் அங்கு பரபரப்பு ஏற்பட்டது.
காவல் விசாரணையில், கோவில் திறந்திருந்த சந்தர்ப்பத்தை பயன்படுத்திய மர்ம ஆசாமிகள், கோவில் கருவறைக்குள் நுழைந்து தங்க நகை-வெள்ளி பொருட்களை கொள்ளையடித்து சென்றது தெரிய வந்தது. இதுகுறித்து அனுப்பர்பாளையம் போலீசார் வழக்குப்பதிவு செய்து விசாரணை நடத்தி வருகிறார்கள்.
