சென்னை – காவல்துறை சார்பில் ‘சலாம் சென்னை’ குறும்பட வெளியீடு

சென்னை – காவல்துறை சார்பில் ‘சலாம் சென்னை’ குறும்பட வெளியீடு

சென்னை வேப்பேரியில் உள்ள காவல் ஆணையர் அலுவலகத்தில் காவல்துறை சார்பில் கோரோனா காலகட்டத்தில் மக்களை காக்கும் பணியில் முன்னின்று சேவையாற்றும் முன்களப் பணியாளர்களுக்கு நன்றி தெரிவிக்கும் வகையில் “சலாம் சென்னை” என்ற குறும்படம் வெளியிடப்பட்டது. இசையமைப்பாளர் ஜிப்ரான் இசையில் சென்னை சூப்பர் கிங்ஸ் அணி வீரர்கள் மற்றும் தமிழ் திரையுலக நடிகர் நடிகைகள் பங்கேற்று நடித்த இந்த குறும்படத்தை சென்னை காவல் ஆணையர் மகேஷ் குமார் அகர்வால், இசையமைப்பாளர் ஜிப்ரான் ஆகியோர் வெளியிட்டார். இந்நிகழ்ச்சியில் தெற்கு கூடுதல் ஆணையர் தினகரன், போக்குவரத்து கூடுதல் ஆணையர் கண்ணன், கூடுதல் ஆணையர் தலைமையகம் அமல்ராஜ், கிழக்கு இணை ஆணையர் சுதாகர் உள்ளிட்ட காவல்துறை உயர் அதிகாரிகள் பங்கேற்றனர்.

நிகழ்ச்சியில் பேசிய இசையமைப்பாளர் ஜிப்ரான்,

நிறைய பாடல்களை தான் இசை அமைத்திருந்தாலும், மக்களின் பாதுகாப்பை கருத்தில்கொண்டு இசையமைக்கப்பட்ட இந்த விழிப்புணர்வு பாடலில் தனக்கு பங்களித்த காவல்துறைக்கு நன்றி தெரிவித்தார்.

தொடர்ந்து பேசிய காவல் ஆணையர் மகேஷ் குமார் அகர்வால் கூறியது,

சென்னையில் 2, 400 காவல்துறையினர் கொரோனா தொற்றுக்கு உள்ளானபோதும் சென்னை காவல்துறை கொரோனா தடுப்பு பணியில் தொடர்ந்து தீவிரமாக செயல்பட்டு வருவதாக தெரிவித்தார். மேலும், சென்னை மக்களின் ஆதரவைப் பெற்ற சென்னை சூப்பர் கிங்ஸ் அணியின் ஆட்டத்தை கொரோனா சூழல் காரணமாக காணமுடியாமல் போன சென்னை மக்களின் ஏமாற்றத்தை போக்கும் வகையில் இந்த விழிப்புணர்வு பாடலில் சென்னை சூப்பர் கிங்ஸ் அணி வீரர்களை இணைத்ததாகவும் அவர் கூறினார்.

தொடர்ந்து பேசிய அவர், பொதுமக்கள் முகக்கவசம் அணிவதையும், கைகளை சுத்தம் செய்வதையும், சமூக இடைவெளியை கடைபிடிப்பதையும் கடைபிடிப்பதே இந்த நோயை நிரந்தரமாக ஒழிக்கும் வழி என்றார். மேலும், சென்னையில் வணிகம் மற்றும் தொழிற்துறை வளர்ச்சி விரைவில் மீண்டும் வரும் எனவும் மக்களின் ஒத்துழைப்புடனும், முன்களப் பணியார்களின் அற்பணிப்புடனும் சென்னை கொரோனாவை நிச்சயம் வெற்றி கொள்ளும் எனவும் அவர் தெரிவித்தார்.

இந்நிகழ்ச்சியின் இறுதியாக சென்னை காவல் எல்லைக்குட்பட்ட பகுதிகளில் குற்றச் செயல்களில் ஈடுபட்ட குற்றவாளிகளை விரைந்து கைது செய்து நடவடிக்கை எடுத்த காவல்துறை அதிகாரிகளுக்கு சென்னை காவல் ஆணையர் மகேஷ் குமார் அகர்வால் பாராட்டு சான்றிதழுடன் வெகுமதியும் வழங்கி கௌரவித்தார்.